早幾個月，發現我部MacBook 舊電發左水，脹大到頂住trackpad 個制，搞到無啦啦會當我禁左個制咁。
除左舊電會發水，層樓都可以發水。實用率越黎越低不在話下，原來唔同單位唔可以亂比較，因為大家實用率不同，建築面積高原來唔代表單位內籠一定高。發展商人話，大家買樓的時候都預左單位會發水，買地成本都會因應提高，所以唔可以話發水會令到發展商多賺到錢。
聽落有點道理，不過信報林行止專欄早排指出一點，又更有道理咁。因為起樓有得發水，一個發展商如果識得挖空心思，左度右度搵盡各種方法黎發水，咁樣佢的投地成本就可以越低。當然每個發展商的發水功力各有不同，發水能力低的，自然唔夠發水能力高的發展商比。結果就係，發水力強的就可以低價買地，發水力低的就要比多D錢。咁搞法，發展商之間的競爭，唔單止係鬥起樓質素，更加係鬥邊一間可以更取巧，可以發更多水，起埋更多唔等洗的野出黎博發水。
以上的評論，搞到我好似仇商咁，查實就未必，我只係想指出起樓發水有咩唔好。而另一方面，唔單只商家可以發水，而家連工人返工都可以發水。食飯照計唔應該做野，可以休息下，明明唔係做野但又可以當返緊工。起樓發水比人鬧，但返工用發水方法黎計最低工資就當成理所當然？人工低故然值得幫助，不過希望唔好學埋D發展商咁，一齊鬥取巧黎諗住篤高工時黎掙多D錢。
無論起樓，或者返工，甚至我舊電，希望都唔好玩發水，搞到大家頭都大埋，一味真亦假時假亦真。
